الأعمال الشعرية الكاملة – عريان السيد خلف

هذا الموت…
هاجس يبدي بينة بلحظة التكوين…
ويرافكِّنه العمر من غير ضجّة وصوت…
على جف المنايا مشر غدين ننام…
ونلهث على الدنيا ونبّني بيها بيوت…
ونتعافى ونذم بالخلكَ هذا وذاك…
وعلى غفلة وزركَ جدامنة التابوت…
حاضر وأربعينك بعد ما حلّت…
وروحك يل العزيز بروحنة أنشدّت…
يل حاضر عزاك تعزّي المعزين…
وتسكّت الناعي العبرتّة أحتدت…
يا عصر الفواتح يا زمان الموت…
كافي من الذبح مو ناس ما ظلّت…
ضاكَت كَاعنه من كَبور فوكَ كَبور…
فوكَ كَبور أهلنة كَبورنا أتعلَت…
كل يوم بهبية وكل صباح بويل…
مثل سف الحصير الزلم تتسلت؟…